Litteratursalong med Kjartan Hatløy i samtale med Sivert N. Nesbø

Kjartan Hatløy har lenge hatt ei brennande interesse for egyptologien. I Mot kaos omset han denne lidenskapen i dikt. Boka opnar på diktarens heimstad ved Åfjorden og Lifjellet og trekkjer forbindelsen til Det gamle Egypt – til Nilen og pyramidane i Giza og Luxor. Storleikar frå oldtidas førestillingsverd kjem til syne langs vegen, i skog og vatn, og Hatløy går i dialog med den gammalegyptiske måten å tenkje om livssyklusen på: Han gjer døden til reisekamerat. 

Cellist Eline Sundal spelar til Hatløy sine opplesingar. 

Kjartan Hatløy debuterte i 1996 med diktsamlinga Solreven. Sidan har han gitt ut ei lang rekkje kritikarroste samlingar. Kjøkkendikt frå 2012 blei innstilt til Brageprisen, mens Den kvite vegen (2016) blei innstilt til Ungdommens kritikerpris og er omsett til tysk. I 2017 kom Dikt i samling ut, som inneheld alle Hatløys bøker t.o.m. Den kvite vegen. Same år utgav den tyske filmskaparen Frank Wierke ein dokumentarfilm om forfattaren, Der Sonnenfuchs. Diktsamlinga Mot kaos. 100 dikt om Egypt (2025) er Kjartan Hatløys 15. samling.

Hatløy er rekna som ein av våre største naturlyrikarar. I 2015 blei han heidra med lyrikkprisen Diktartavla for sitt markante forfattarskap. Den legendariske diktarstien i tunet på Hardanger folkemuseum blei med dette utvida med steintavle nr. 24. Diktartavla skal fremja positiv merksemd om norsk lyrikk og er eit samarbeid mellom Haugesenteret og Hardanger folkemuseum.

I 2021 vart Kjartan Hatløy tildelt Doblougprisen for heile sitt forfattarskap.