Fest i Fjaler: Augustikveld i Klokkargarden
Eg skal ikkje gløyme kvelden, augustikvelden, du veit,
eg lå utmed stranda og pilka den stunda då fisken beit.
I vest stod ei diger kveldsol og lutte mot himmelrand,
men det var ei jordisk kveldsol som skein på ei jordisk strand.
Informasjon
Laurdag 9. august kl. 20: Augustikveld i Klokkargarden
Ei feiring av forteljekunsten og markering av Jakob Sande - nasjonalt senter for forteljekunst 5 år!
Festprogram på utescena i Klokkargarden med Halvor Folgerø, Siri Sande, Kjersti Wøien Håland, Irene Kinunda Afryie, Ragnar Hovland, politikarar, Kjetil Stavenes, Baksaas & Høyer, Mute mode.
Om det vert dårleg vær vert Augustikveld i Samvirket.
Då Gud heldt fest i Fjaler (skrive 10.august 1954)
Eg skal ikkje gløyme kvelden, augustikvelden, du veit,
I vest stod ei diger kveldsol og lutte mot himmelrand,
men det var ei jordisk kveldsol som skein på ei jordisk strand.
Då var det som alt vart omskapt, eg merka det litt i senn.
Eg var som Johannes på Patmos, Patmos i bibelen.
Former og fargar skifte på strender og firmament,
det som var kjent, vart ukjent, og det som var ukjent, kjent.
Eg såg meg ikring forbina, og vende meg fyrst mot aust,
der tempel imot meg lyste istadenfor gamle naust.
Og høgt over spir og kuplar slo regnbogen opp sin krans
mot veldige, ville snøfjell, lauga i måneglans.
Då såg eg kometen komme, han kom som ein storm frå sør,
og drog over himmelkvelven sitt blodraue ris av glør.
Velsigna og høgt forbanna han sigla sin kurs mor nord,
til berre ein gyllen avglans låg att over fjell og ford.
Fargen i sjøen skifte frå blodraud til silkeblå,
og småfisk kring ripa leika med gylte kruner på.
- Botten på femti famnar låg som eit eventyr
med skimt gjenom myrk koralskog av storfisk og fabeldyr.
Fjøra med fuglelivet og skogen i lia der
låg omskapt for augo mine, og kom meg med eitt so nær.
I staden for tjeld og hegre steig ibis og pelilkan,
og palmer og seder susa der før det stod bjørk og gran.
Då var det eg høyrde songen frå slippen på Salbu strand,
og ut gjenom stengde portar kom syndarar hand i hand.
Med hammar og tong dei helsa eitkvart som dei såg i sky,
- eg trur at dei såg mot Staden, Jerusalem, Herrens by.
Eg skal ikkje gløyme kvelden, det var ein augustikveld,
Vårherre heldt fest for folket i Fjaler prestegjeld,
- Bergens Stift, som det heitte, - Ytre Sunnfjord prosti.
Gud unne oss alle nåden når timen vår er forbi.
Jakob Sande
frå samlinga Sirius, 1955.
Ansvarsfraskrivelse
Ikkje refunderbar billett.