Eit møte med Ingvar Nistad og Sverre Kvamme

Ingvar Nistad (f. 1954) er forfattar og lyrikar frå Fjaler. Nistad debuterte med diktsamlinga Eg les denne steinen i 2000. I 2008 ga Nistad ut si andre bok, Dagane i Cholpon-Ata. Her presenterer han eit heilt særeige univers der forteljaren vandrar ved innsjøen, i gatene og sit i hagen under frukttrea. Slik er dagane i Cholpon-Ata, og slik flettar forteljingane seg saman til ei diktbok heilt utanom det vanlege. Under Säfstaholmen er Nistad si tredje bok. Først er det ein son som har ordet, han vitjar faren; den geografiske ramma er Pfalz. Sidan er staden ein annan, og no har faren ordet; han pratar med seg sjølv, han talar til veggene.

I tillegg til forfattargjerninga er Ingvar Nistad også keramikar og lærar. Han bur i Fusa.

Ingvar kjem heim til Fjaler saman med sonen sin, Sverre Kvamme. Sverre Kvamme har en bachelorgrad i samtidskunst, studerte film ved European Film College i Danmark og Nordland kunst- og filmhøgskole. Han har ei personleg tilnærming til eigen prosess som filmskapar, og utforskar tematikk rundt kjønn, barndom, død og sorg. I 2021 langfilmdebuterte han med dokumentaren Nattebarn. Under Fest i Fjaler viser Sverre ein kortfilm han har laga om bestemor si, Gunnlaug, frå tida då ho var den  siste gjenlevande i Nistadlia i Dalsfjorden. Der kor tida gjekk sakte og ein hadde god tid til det meste.

Programpost i samarbeid med Rom for ord.