Forteljekunstakademi dag 1 torsdag 13. august

Du kan!

800 jenter. Så mange elevar var innom det vidgjetne Nikka Vonens Pigeinstitutt i Fjaler. Bjørnstjerne Bjørnson sende barn og barnebarn hit, og den første kvinna på Stortinget, Karen Platou, gjekk i skule hos Nikka. 

I i ei tid då få jenter fekk utdanning, via Nikka seg til å skikke elevane sine til livet. Ho må ha lukkast, for vitnemåla om Nikka er mange og gode. 

Livsverket hennar var hjartedanning, sa soknepresten Døskeland. I eit minneord skreiv han: «Hennar undervisning og oppdraging av elevane var i beste forstand øving i livskunst». Ei av jentene sa: «Samværet med Nikka ga oss alltid mot og håp. Det var som om hun sa, med eller uten ord: Du kan!».

Under årets tema kvinna, tek Sandesenteret sats i arven etter Nikka. 

Velkomen til Forteljekunstakademiet «Du kan!», der du blir kjend med Nikkas idear om danning og utviklar dine evner til skriftleg og munnleg forteljing. 

Program (blir oppdatert)

DAG 1: TORSDAG 13. AUGUST

10-12 Verselesingskurs på Steia gard

Nikka var inspirert av N.F.S. Grundtvig og folkehøgskulerørsla, som la vekt på det levande ordet og danning. I undervisninga vektla ho samtale, refleksjon og munnleg formidling. På dette kurset arbeider vi med det levande ordet. Vi går til hjarta av Jakob Sande sine dikt og finn fridomen i bunden form. Kurset gir innsikt i diktaren sin prosess og øving i munnleg framføring. 

Kursleiar Liv Hege Skagestad er rådgjevar i Sandesenteret og kunstnarleg leiar ved Den mangfaldige scenen og Nynorskens hus i Oslo. Ho er utdanna sivilingeniør og innan teater, og vaks opp på Romerike Folkehøgskole.

12 Nikka Vonens matbord i Løa. Lunsj er inkludert i billetten

13-15 Undervisningskunst på Steia gard

Undervisningstimane til Nikka var feststunder. Ei av jentene fortalde: «Nikka forstod hver eneste en av oss. Hun ga seg ikke før hun hadde hjulpet oss over det som var vår særegne vanskelighet». Og kanskje var det nettopp dette som hadde størst påverknad på mange av elevane hennar: Dei opplevde å bli sett. 

Velkomen til ein bolk med samtalar og praktiske øvingar innan pedagogikk og formidling. Økta blir leia av pedagog, museumspedagog og dagleg leiar i Sandesenteret Rakel C. W. Solheim. Med seg har ho m.a. professor i kulturvitskap Tone Hellesund, som har forska på skeiv historie og ambisiøse kvinner med uvanlege liv frå Nikkas tid.

1630 Middag i Løa (Middag kjøpast utanom billetten)

18-19 Nikka Vonens hemmelege hage

Nikka hadde eit stort engasjement for planter, hagestell og nyttevekstar. Jentene gjekk på fjellturar, hadde fiskerett i elva, drog på utferder og observerte planter, dyr og landskap. Hagen var vakkert opparbeidd med frodige blomebed, bærbusker, pryd- og frukttre, og mange fine små hus. 

No gror nye spirer på Steia gard. Saman med Nikka Vonens venelag inviterer vi til ein time med oppdagingsferd og forteljebål i Nikka Vonens hemmelege hage. Oppdagingsferda blir leia av Aleksander Rauboti frå Musea i Sogn og Fjordane, og med seg har han b.a. andre historikar, høgskulelektor og Nikka Vonen-biograf Greta Hekneby.

18-20 Lukka kurs med E.V. Crowe: Perfekt norsk? Dårleg norsk? Kva om KVA du vil seie er viktigare enn KORLEIS du seier det?  

Kurs for deg som har norsk som andrespråk. Les meir og meld deg på her. 

20 Konsertframsyninga Formødre

Pianist og musikkformidlar Sara Aimée Smiseth kombinerer virtuost klaverspel med levande historieforteljing. Ho tek publikum med gjennom 350 år familiehistorie, sett gjennom liva til ni generasjonar kvinner – akkompagnert av ikoniske verk frå klaverhistoria.

Billett må tingast utanom. Ting billett her.